香港上環｜Wing Wah Southeast Asia Cafe

久違了的正宗咖吔西多士😱😱配一杯凍檸茶少甜 降了不少溫度🤧🤧🤧🤧下次再來吃他的海南雞飯 車還可以泊門口（可是要注意抄牌）

太平山街向來自成一角，小社區內除了聚集咗多間別樹一幟嘅 designer store、boutique 之外，還有不少個性小店，所以每逢周末，都吸引不少區外人到此落腳。 這天相約好友到「POHO」尋寶，消磨了大半天，雖然未至於滿載而歸，但亦略有斬獲。行到鬼咁攰，很想找個地方歇息，友人提議嚟呢間主打南洋美食嘅「榮華南洋冰室」吃頓 late lunch。 餐廳位於差館上街，門面十分搶眼，牆身髹上一身亮光的藍色外衣，再配以黑底金字招牌，既鮮明又奪目。 店內擺設亦令人眼前一亮，綠白相間嘅紙皮石地板、木檯凳、用環保木砌成的水吧，裝潢懷舊，風格帶點南洋的味道，嚟打卡就最適合不過！ 先細看餐牌，食物滲透東南亞風情，咖央多、香茅豬扒、海南雞飯、泰式沙嗲串燒、秘製咖喱，甚至連南洋全日早餐都有，選擇都幾豐富。 我哋點咗海南雞髀飯 ($68) 同 南洋特色常餐 ($58) 各一份，兩客套餐均奉送熱飲，如果想轉凍飲，則須另 +$4。 雞肉已去骨，仲要係髀位，入口啖啖肉，皮爽肉嫩，肉味亦非常濃郁，配泰式辣醬及薑油吃，味道有層次。油飯也有水準，顆粒分明，有咬口兼帶微微韌性，鹹淡亦恰到好處。 常餐有香茅豬扒、黃薑雞扒、海南雞翼等可供選擇，揀咗蒜香牛油雞翼配金邊粉，套餐附有炒蛋、火腿、腸仔和牛油多士，如果想轉奶油豬或咖吔多士，則須另 +$5。 牛油雞翼即叫即炸，外皮脆卜卜，入口好重蒜蓉同牛油香，肉質鮮美多汁，夠晒惹味。金邊粉分量亦不欺場，大大碗，滑溜又煙韌。 話晒都係南洋餐廳，一場嚟到，梗係要試埋佢哋嘅咖吔多。見到水吧旁邊放滿了一罐罐香蘭葉咖央醬，想必是咖央多的靈魂。 味道果然有層次，咖央醬甜度適中，入口帶陣陣斑蘭香，風味十分正宗。食完再配番杯凍飲，非常滿足。

同好友去上環拜完神，正值下午時間好肚餓，於是行落下幾條街搵嘢食，見到尼間裝修得好有香港懷舊格調，就入去試試 打開餐牌，很多不同種類的南洋食品，樣樣都想試 最後決定點了冬陰公牛柳粒金邊粉，喝一口冬陰功湯，微酸但不太辣，很開胃，金邊粉軟硬適中，掛上冬陰公的湯就更加惹味，牛柳粒跟切片紅羅白，豆角，洋蔥，紅椒和豆卜一起炒、食落更豐富 再加牛油雞翼，雞翼外層炸得酥脆，面頭灑上炸過的蒜頭，十分香口，只可惜加追了二隻，實在唔夠喉，下次再食過 很喜歡吃咖吔，咖吔多士經常吃，今次試吓咖吔西多，西多煎得外層金黃微脆，入口先感受到蛋香，繼而是牛油的香味、最後是清幽的咖吔味，整個配搭非常夾 店員放下南洋奶茶跟我們說要等十分鐘，那麼茶味就更濃郁，茶香加上煉奶的香滑，美味