香港荃灣｜Old Fung Tea House

今日粗眉仔約咗兩個朋友飯聚，人多啲自然最好食點心。 呢間點心店喺荃灣地鐵站附近，由室內佈置到餐具都好有老香港嘅感覺，本身已經係一個影相打卡嘅景點。 原本叫咗兩個飯嘅，但係粗眉仔掛住食，居然唔記得幫土魷肉餅飯影相，認真失敗……不過好在又同蝦醬肉片飯影相，補返數。 佢哋嘅飯係砵仔蒸飯，所以飯粒乾身而且飯味特別香濃。肉片肥瘦均勻而且厚度夠，蝦醬味道濃郁，越食越滋味。 家陣香港好多餐廳酒樓都已經唔做咖喱魷魚呢味點心，可以食到已經難得，更加難得嘅係佢哋個咖喱汁一啲都唔馬虎，除咗咖喱味之外仲有唔同香料嘅味道，層次感豐富，可惜份量有啲少，到喉唔到肺。 芋頭流心包喺其他酒樓餐廳都未見過，概念其實同流心奶黃都差唔多，不過個餡就變咗芋頭蓉。芋頭蓉有濃濃嘅芋頭香味，但係食落唔算太甜，滿足得來又唔會太有罪惡感。 大家對蝦餃絕對唔會陌生，但係呢度嘅蝦餃特別好食，好就好在嗰層蝦餃皮，煙韌得來乾身，唔會爛蓉蓉黏埋一劈，餡料嘅竹筍蝦仁比例亦都好適中，口感舒服仍然不失層次感。 XO醬蘿蔔糕唔算太特別，但係配埋佢哋嘅真正辣椒醬就乜都贏晒。 米皇腸物入面有油炸鬼同埋一層薄薄嘅蝦膠，層次分明而且爽脆彈牙，非常有心思嘅設計。 雖然飽到上心口，但最後都叫咗佢哋嘅古法千層糕。千層糕鹹蛋蓮蓉同椰絲相間，一鹹一甜配合得天衣無縫。 三個人夾埋只係需要$255 ，絕對係物有所值。

點心好好食😃😃😃需要在門外等位、等夠人頭才進去。只能點一次食物，份量比預期少，建議預計每人食三至四碟點心。

置身舊年代中品茶、 嚐美食一樂也 ！😋😋😋 可以回頭再吃的食店。🤗