香港佐敦｜七福神和食亭

餐牌主打刺身壽司、炸物小食、燒烤串燒、日式料理等；裝潢以日式木系風格！卡位特多坐得舒適。

親民日本料理 約了好友來依間居酒屋食，地方都幾大的，佈置日式簡樸，美食選擇多，價錢親民，份量十足，難怪吸引咁多食客光顧。 蟹籽沙律(細) $60 沙律超大碗好震撼，蟹籽大堆，要將沙律醬撈青瓜絲，但份量太多好易撈出碗外，青瓜絲爽脆又長長的可以當麵食，係幾健康開胃的前菜。 芝士焗天火蠔 $90 蠔身飽滿肥美，味道鮮甜，佈滿白汁芝士煙肉碎，芝味十足邪惡又好味。 鹽燒三文魚頭 $75 半邊魚頭大件，魚皮燒得焦香，魚肉嫩滑好食。 醬油燒京蔥雞肉 $50 爽口大葱多汁美味，雞肉大件燒汁美味。 清酒煮大蜆 $95 海蜆大隻有肉好多隻，蜆肉鮮甜，散發陣陣清酒香。 蟹味噌甲羅燒配鱈魚乾 $68 甲羅燒香氣撲鼻，蟹膏咸香鮮味。配以脆卜卜甜絲絲的鱈魚乾好匹配，超正。 西京燒銀鱈魚 $178 魚肉口感嫩滑，西京味噌入味，味道香甜不油膩，可以慢慢歎。

今晚要同老公去辦年貨，購物之前當然要叉足電先。最近成日都想食日本嘢，最後揀咗好評多，口碑好似幾好嘅七福神食餐好。 餐廳唔算好大，卡位寬敞舒適，環境非常乾淨企理，燈火通明。食品款式種類非常多，多到唔知揀邊樣，樣樣都好似好吸引，千揀萬揀，最後叫咗以下幾款。 🏆 八品刺身盛合 $438 ·三文魚、季節魚、油甘魚、八爪魚、帶子、北寄貝、甘蝦、海膽（半板） 賣相吸引，擺盤有心思，價錢非常合理，有半板海膽真係無得輸。海膽好鮮甜，無腥無臭亦唔苦澀，高質！北寄貝味道甘甜，口感爽脆，鮮味十足。三文魚都好正，厚切口感佳，新鮮甘香。甘蝦都十分新鮮甘甜，口感粘糯。其他刺身都相當有質素！ 🏆 墨魚咀唐揚 $65 見到墨魚咀十分興奮！因為唔係度度有得食，今晚當然要叫嚟試吓啦！唐揚製法，外皮酥脆甘香，墨魚咀口感煙韌有嚼勁，點上檸檬汁及蛋黃醬，味道更清新美味，連我老公都讚好👍🏽。 🏆 蟹味噌甲羅燒（鱈魚干）$68 相當有份量，$68真係勁抵食！蟹膏鮮味濃郁，鹹甜恰到好處，仲一啲都唔腥，口感好滑好creamy，配上脆卜卜、甜甜哋嘅鱈魚干，好食到停唔到口，滿足感爆燈！ 🏆 冷蕎麥麵 $60 蕎麥麵口感煙韌，條條分明，點上芝麻味香濃嘅秘製鰹魚醬汁，可口清新，食完唔覺滯。 🏆 三文魚腩壽司 $32 特長三文魚腩，令人食指大動！刺身有入口即化嘅感覺，油脂味超香，口感嫩滑，珍珠米晶瑩剔透有彈性，好味！ 🏆 蟹籽壽司 $26 蟹籽新鮮爽口，無半點腥味，紫菜香脆，正！ 🏆 楓糖蕨餅 $38 晚餐當然要叫埋甜品先至圓滿。本身有少少擔心會食唔晒，不過，蕨餅好食到唔存在食唔晒嘅可能！真係超好食！蕨餅口感Q彈清甜，黃豆粉香，再點上甜味香濃嘅楓糖可謂如虎添翼，大愛！ 最後，真係要大讚各員工嘅服務，非常細心有熱誠，殷勤有禮，令客人有賓至如歸嘅感覺！