香港尖沙咀｜京笹 居酒屋

京笹居酒屋雖然位處尖沙咀，窗外望出海防道人潮熙來攘往，但亞士厘道嘅入口真係行開尖沙咀嘅都無邊幾個會行到過嚟，默默地瑟縮喺鬧市一角。之不過但凡有美食之處，總會有唔少有識之士，當你以為佢哋座落 喺唔起眼嘅位置，偏偏京笹就長期滿座，最好記得提前訂座。 京笹係正宗日本人喺香港開設嘅居酒屋，每次打電話嚟訂座都聽到老闆好親切嘅日本腔廣東話。入到去環境就逼逼哋，同埋會聽到好多日文，證明都唔少在港日本人嚟幫襯。 坐低之後就店員會拎份前菜過嚟，日日都唔同款，甚至乎同一日唔同時間嚟都有機會唔同，今次呢款有啲wasabi味幾開胃。 之後就咩都唔駛講，即刻叫咗個刺身沙律，每次嚟都係必食，刺身同沙律混埋一齊真係出奇地咁夾，我覺得直頭係鎮店名菜 除咗刺身沙律，其餘都係末必會次次必食，畢竟京笹menu咁多選擇，真係有排試 蒜片牛柳粒(4/5) 其實好好食，但真係唔襟食，如果慢慢食，啲牛柳粒凍咗就即刻變得唔好味，所以要趁熱食，牛柳加蒜片真係perfect match 炸蝦天婦羅(4/5) 其實之前嚟都有食開，但今次炸到少少過咗籠，但入面隻蝦都係咁正 汁燒鰻魚(5/5) 平時叫開銀鱈魚西京燒，真係超好食，今日就試吓鰻魚，嘩又係咁正，啖啖肉，條鰻魚好鬼肥美，個鰻魚汁都調到好好味 八爪魚魚餅(5/5) 其實呢個都幾乎每次必食，即使你入去望吓隔離檯分分鐘檯檯都有叫，魚餅整到好鬼好食，軟綿綿得嚟又煙煙韌韌咁，仲好香口 今次試住咁多，京笹一直都係我長期飯堂，仲有好多正嘢未被發掘，好快又會再嚟試新嘢，埋完單老闆又送咗張飲品卷嚟，儲儲埋埋都3-4張，真係逼人又嚟幫襯

服務一絕，味道不錯

日本人開的居酒屋，價錢合理，食物新鮮，食品種類繁多，加上地道日式的烹調方法，令人猶如置身於日本。熱門的餐廳，宜先預約。