香港中環｜The Cupping Room (上環)

超好食嘅Sunday Pasta Lunch🍝😋 星期日訓到黃朝百晏先肯起身，醒咗就去附近行下搵下有乜好食，有間Coffee Shop我想試咗好耐，但喺九龍區返工一直無機會試下，佢夜晚又收得早。呢日機會終於嚟喇😉。 餐廳位置雖然唔喺大街，但都唔難搵，喺正樓 梯隔離。可能已經兩點，所以唔洗等位就入得。有得揀嘅情況下，我哋梗係揀Bar枱窗口位啦，成個感覺即刻變得Chill Chill的，哈哈🤣。 由於有啲肚餓，所以我哋喺云云食物中揀咗兩款Pasta食🙈，其實早餐麵包類嘅佔多數！飲品方面，除咗咖啡以外，都有唔少其他選擇，啱哂我。 正如餐牌所講，食物製作需時，所以飲品上先🥤。唔鍾意飲咖啡嘅我要咗Iced Cold Brew Tea($40)，我第一樣見到嘅係餐廳走塑，採用紙飲管👍。我估計杯茶應該係綠茶底？但又有微微嘅香草/香茅/薑味，我都唔係好Sure，總之就清清哋，幾好飲🤤。 Squid Ink Spaghetti Aglio E Olio($128)，一上碟我就知道佢同平日嘅墨魚汁意粉有唔同，因為佢嘅墨魚汁唔係個意粉醬汁，而係喺整意粉嘅時候落咗，所以意粉呈現黑色，唔會甩色，食到成咀都係🦑。 意粉賣相ok的，有唔少香草🌿同埋芝士蒜粒，而且油份夠，唔會乾身，食落亦都夠味，仲有少少辣添！但一開始我朋友有啲嫌棄，因為覺得百幾蚊碟意粉得一隻蝦🍤，好孤寒，點知摷下摷下有開心大發現，因為有另外兩隻蝦收埋咗喺底🤩。蝦肉大大隻，新鮮又爽口，唔錯！ Spaghetti w/ Garlic Cream Sauce ($118)，配雞胸就唔使加錢，配Smoked Salmon煙三文魚就加$10。我係煙三文魚控，所以一定要後者。果然意粉一上碟就已經好香😍，餐廳會稍為將煙三文魚煮熟，完全將份煙熏鹹香味昇華。 煙三文魚份量唔少，而且真係好好食😋，同意粉個醬勁夾！忌廉汁好濃好重胡椒辣香，面頭啲芝士仲有輕輕灸燒過，勁高質！意粉非常掛汁，但留意返個汁係比較Thick，所以整體偏杰身。 餐廳雖然係自助出去點餐，但店員服務都幾好，好有禮貌，好友善😊。收銀機位置仲有個架賣咖啡豆同牛角包的。 總括嚟講，呢間Coffee Shop出品嘅意粉真係好好食😋，所以抵佢愈開愈多分店。唯一扣少少分就係份量唔算多，男仔當Lunch食就可能爭少少，哈哈。再者，定價都偏高，但好似平日有Lunch Set會包埋飲品，抵啲。有機會我一定會試埋佢啲包包，同再Encore Pasta！

咖啡層次分明，不同溫度感受到不同的香味。 店員很親切，幫朋友買咖啡豆她們也很熱心的介紹，咖啡好喝，服務親切，推薦唷！

服務很好，食物很好，員工有禮貌，👍👍