香港太子｜佐禾町

前前後後過黎食咗五次,試過壽司&刺身定食,鰻魚定食,天婦羅定食,牛舌丼飯,覺得係值得推介嘅同路人店舖!原因主要有兩點: 1. 嘢食好味,佢嘅魚生食得出好有鮮味,可以感覺到食材檔次(或者處理方法)高過壽x朗(呢個係基本要求啦,但好多日本料理舖都做唔 到);鰻魚鮮甜多汁,冇腥味;牛舌厚切,爽朗彈口;而佢嘅前菜每次都唔同,有時候係豆腐,有時候係貝類,但都幾開胃。 2.價錢有競爭力,呢間嘢嘅定食系列最貴(刺身定食98+晚市額外30蚊)都係128,但會食到比較貴嘅食材(例如虎蝦刺身,海膽),對比啲連鎖壽司舖,如果叫同樣等級嘅嘢,分分鐘會更加貴。而且有平價且質素高嘅選擇,例如68蚊嘅定食系列,甚至係48蚊嘅丼物,都好值得食。

其實呢間位於太子既日本餐廳已經bookmark左好耐好耐，聽聞佢地既刺身定食非常抵食仲好高質，百聞不見如一見，終於搵到時間去試下👻 🥢刺身定食($98，18:00後+$30) 呢個定食包括：刺身6款、沙律、前菜、麵豉湯同埋迷你蔥花烏冬。沙律係芝麻醬冷豆腐，而前菜就係炸餃子🥟，落左單先炸所以送上嚟個陣仲係漲卜卜，食落熱辣辣㗎👍🏻麵豉湯入面仲有好多蜆添😍好有驚喜 跟住就到呢個定食既主角－刺身💖 當日既刺身為：三文魚、油甘魚、黃金魷魚、帶子、赤蝦同鮟鱇魚肝🐟 每一樣刺身都非常新鮮，三文魚好大片而且成cm厚，油甘魚食落油脂香都幾出。帶子好鮮甜，但黃金魷魚就有少少偏鹹了。 至於我自己覺得最好食既就係鮟鱇魚肝同赤蝦🦐當個定食送到上嚟，而入面竟然有鮟鱇魚肝既時候已經即刻心心眼左😍!!!因為我非常鐘意食鮟鱇魚肝🤤而質素亦無令我失望，好好食好有油香，入口即溶。除此之外赤蝦亦非常高質，蝦頭入面有極多蝦膏，多到係塊木板上面形成左一個蝦膏池🤣蝦肉亦好鮮甜同好厚，沾埋蝦膏一齊食係一絕👍🏻👍🏻 不過成個餐較失色既地方就係個迷你烏冬，比較淋身唔夠彈牙，而且同刺身一齊食唔係好夾，如果可以改成冷烏冬，或者可以轉飯就會更好了🙏🏻 呢個定食整體嚟講非常非常高質，$98唔使加一CP值真係高到突破天際💜而且味道真係好好，食完之後好滿足。除左呢個刺身定食，其他和風定食同丼物既價位都非常親民，所以快啲去支持下佢地啦👻

抵食的壽司和刺身定食，平民日式店，值得支持！