香港荃灣｜方叔叔重慶老火鍋 (如心廣場店)

方叔叔重慶火鍋店前身係渝味曉宇火鍋店，之前身邊有朋友食過話唔錯，今次終於喺改咗名又裝修咗之後嘅荃灣分店打邊爐！裝修完冇耐嘅店內環境所有嘢都新簇簇、好乾淨，木系風有d似日本餐廳格局！一坐低就有雪耳紅棗冰糖糖水款待食客！最欣賞食材大部分可以揀選半份，非常了解食客想食多啲唔同食材嘅心理！上菜速度她快，由QR code落單到上菜不過係幾分鐘時間！侍應加湯加水好合時，講嘢輕聲有禮，服務唔錯！ ————————————————————————- ➺➺鴛鴦麻辣鍋$38/位(養生花膠雞鍋另加$20/位） 湯底按人頭計感覺更划算，鴛鴦麻辣鍋包括一個麻辣大紅鍋加自選一款湯底，揀咗9至11月季節限定養生花膠雞湯底再加$20/位，想食要趁11月最後機會！麻辣大紅鍋辣到揀咗普通，原來都幾辣，食物好吸麻辣味，雖然辣，但越辣又越追食！大黃雞鍋湯底好足料，有唔少雞件、花膠、蟲草花、杞子，飲落幾清甜潤喉！ ➺➺嫩牛肉（半份）$48 切得好厚身，一咬落去感覺軟腍腍，再咀嚼發覺爽爽地幾有口感！ ➺➺手打魚籽蝦滑（半份）$58 手打蝦滑當然係比較彈牙同爽滑，加咗魚籽添加咗鹹香！ ➺➺黑豚腩肉(半份）$48 長長6大塊，肉質比較厚實，唔太硬又唔太軟！ ➺➺手打四寶丸（半份) $58 可以試晒四種丸，牛丸、豬肉丸、蝦丸、墨魚丸，口感Q彈爽口，肉質鮮嫩！ ➺➺鰻魚(白鱔）（半份）$58 望落去個樣已經覺得幾新鮮，淥完之後魚肉完全冇鬆散，食落仲幾爽口！ ➺➺紐西蘭精品羊肉卷(半份）$58 半份份量都唔少，羊片薄切一口一片，食唔到有羶味，細細片索晒湯汁，好食！ ➺➺鮮竹笙（半份）$38/唐生菜（一份）$28/娃娃菜(半份）$18 蔬菜菇菌類望落都好新鮮，食落爽甜！ ➺➺武隆苕粉（半份）$28 外貌、口感同薯粉好似，但係比薯粉闊身、厚身d，食落又比薯粉煙韌d，個人幾鍾意呢個粉！ ➺➺紅糖冰粉$28 傳統川菜甜品，近期都成日食呢款甜品，但係估唔到火鍋店嘅紅糖冰粉質素一啲都唔差，加咗大量核桃、杏仁、瓜子、提子乾、梅乾等，提升晒成個甜品嘅口感同味道層次！ ➺➺紅糖糍粑(半份）$38 唔可以唔食嘅甜品！趁熱食食到外皮有少少熱氣嘅脆感，入面嘅糯米非常煙韌，加埋紅糖漿食，真係口感之物！ ➺➺水仙烏龍檸檬茶(凍）$48 份量十足，茶味突出，唔重甜味，非常好！ **設加一服務費

恆仔 同佢嘅員工服務一流 嘢食好食

性價比不錯，服務員態度及反應很好