香港荃灣｜牛摩 Wagyu More

你到荃灣嘅市中心想打邊爐 但見到大鴻輝中心要排隊條龍 有啲卻步 於是就去咗隔離嘅千色匯 入邊有間日式嘅任食火鍋 毫不猶豫就入咗去啦 同其他餐廳一樣都係以牛肉嘅等級黎分價錢 有美國嘅牛肉，亦都有日本嘅和牛豐儉由人 咁我就揀咗中間嘅等級 美國IBP牛板腱 套餐 加錢配咗麻辣鴨血湯底 同埋博多美人骨膠原雞湯 麻辣鴨血湯底入邊 係真係有鴨血嘅 而鴨血亦都唔腥 非常之彈牙 骨膠原雞湯 望住牛魔個公仔慢慢咁溶化 之後就係好膠嘅白色湯底 充滿膠質 亦都好濃厚嘅雞湯味 呢度係有得選擇一人一鍋定還是一個大鍋嘅 非常之有彈性 一人一鍋嘅好處就係可以試多啲唔同嘅湯底 點樣湯底之後 就可以出去自助區度攞嘢食啦 呢度有齊晒火鍋配料 飲品甜品 雪糕同埋醬料 最特別嘅係 呢度嘅飲品 唔係剩係得支裝罐裝飲品 佢有鮮果汁同埋沙冰 當然如果加錢另叫仲有啤酒選擇 飲品比坊間嘅火鍋店，更加多選擇同出色 火鍋配料放喺個大雪櫃個雪櫃凍到係見到出晒煙嘅 保持新鮮同衛生 呢度最特別嘅配料就係有苦瓜 我都係第一次打邊爐用苦瓜 食落甘苦 另外仲有豆皮結 襯晒麻辣湯底 丸類除咗大路嘅牛丸，豬肉丸，墨魚丸，龍蝦丸 仲有我最愛嘅薯來寶 即係魚蛋包住年糕 除咗火鍋配料，亦另外亦都有沙律區 有味付螺肉 中華沙律 泡菜 西式沙律 甚至有三文魚壽司 旁邊嘅甜品區亦都有一啲日式果子 蛋糕 芒果布甸 除咗自助區嘅配 另外亦都可以QR code落單 QR code落單，就會有海鮮 同埋肉類 除咗牛肉 亦都有豬肉雞肉同羊肉 第一碟上嘅牛肉 花紋非常之靚 輕輕灼一灼 小小粉紅就食得 又淋又有肉味 就算中等嘅牛肉等級 已經非常收貨 呢度仲有牛舌 又係其他火鍋店比較少有嘅item 切得夠薄 淥完之後 咬落去有啲彈性 又唔會話好韌咬唔開咁 試咗一碟羊肉 佢唔會太多脂肪 食落有羊騷味得黎 又唔會話非常之勁 係大眾都食到嘅羊肉 我哋亦都叫咗另一款美國牛肩胛黎對比下 雖然牛扒冇咁靚 但佢嘅牛味係再重一啲嘅 海鮮試咗青口同魷魚仔 青口係冇沙嘅 離左殼之後都啖啖肉 咬落去有少少鹹味 魷魚仔淥完之後就好煙靭 又唔會話硬到咬唔開 個魷魚筒會有少少湯汁兜住 好襯打邊爐 最後食杯軟雪糕作結 呢度坐得舒服 唔使迫 樓底高冷氣大 食完唔會話件衫一陣味 好值得下次再嚟

Lunch好抵食☺️ 同阿媽下午茶 係晚市之前食，唔洗同人逼。啲牛牛既質素都唔錯，自助吧既選擇都好多，有意再去！！

服務好好，職員都好Nice，種類多同啱食，朱古力雪糕更加不得了😻