香港銅鑼灣｜漁火海鲜刺身火鍋

打邊爐最緊要配料和湯底， 兩者都做得非常用心， 位置相當方便。 店內座位夠闊， 服務又好。 自家竹蔗茅根 ～ 自家製竹蔗茅根，味道非常清甜，打邊爐啱曬。 椒鹽海中蝦 ～ 蝦肉厚實新鮮，鮮味十足又大隻，椒鹽好香口。 醬料兩位 ～ 醬料充足，有我喜歡的蒜蓉、芫茜和香蔥。 花膠響螺燉豬展 ～ 湯料非常豐富，湯頭味道濃郁，未打邊爐先要飲返一、兩碗呀！ 極品騸牯牛 ～ 牛味極重，口感鮮嫩爽口，油脂分佈平均， 非常適合打邊爐，騸牯牛限量供應的，記得要預早訂定呀！ 蘇格蘭蟶子皇2隻 ～ 味道鮮甜爽脆，超級大隻，極之推介。 墨魚拼蝦滑 ～ 自家製產品，爽口彈牙，鮮香滑溜，兩款都做得非常好。 時令什菜籃 ～ 雜菜籃有幾款菜類、鮮冬菇和粟米， 價錢合理，份量十足。 即炸鬆脆響鈴 ～ 即炸響鈴很鬆脆，放落湯底一秒拎上嚟啱啱好。 鮮九肚魚 ～ 九肚魚真心不錯，鮮甜幼滑， 入口滑溜。

地點喺銅鑼灣京都廣場8樓；餐牌主打時令海鮮、刺身同靚湯火鍋。卡位濶落舒適！

三個舊同事相約放工聚吓，呢間經『開飯』預訂有八五折，而銅鑼灣近佢地放工唔駛趕，就咁決定啦！ 出升降機大堂就見到一個蠔櫃，法國生蠔睇見都想食。 店內環境舒適，有卡位仲有廂房，一邊諗食咩，一邊搞調味，發現加芝麻更香。 未齊人，叫啲刺身食住先，J剛趕到就有刺身食啦！ 北海道帶子刺身$138，鮮甜爽口。 法國白珍珠生蠔@$48，入門時已被生蠔吸引，點可以唔食啊。 生蠔柔滑爽身，海水味中帶鮮甜有餘韻，好味！ 北寄貝$58，北寄貝腍中帶脆，鮮甜美味。 湯底揀咗花膠響螺燉豬腱，店員話係真材實料無添加，撈嚟睇吓真係好多料喎：花膠、嚮螺、蟲草花、豬腱、雞腳、圓肉、紅棗...等。 花膠響螺燉豬腱$198，花膠大大件，好味又養顏。每人飲咗一碗湯，湯好甜，真係想成個湯底飲晒。 食火鍋梗係叫壺竹蔗茅根水，清甜滋潤，打個底清清熱氣最正。 肥水大花甲$98，花甲真係好大隻鮮甜肥美，正喎。 本地手切鮮牛頸脊$248，手切鮮牛頸脊好吸引啊！可惜我唔食得，唯有睇住流口水啦。 極品黑豚腩肉$88，極品黑豚腩肉好香肉味，口感嫩滑，直情想獨享一碟呀！ 蒙古肥羊片$98，羊片軟滑有肉香，好食到夾不停。 爽滑豬肚$58，豬肚洗得乾淨無異味，有口感得嚟又唔韌。 萵筍$38，萵筍係火鍋好拍檔，爽脆又唔易過熟，好食。 時令雜菜籃$78，雜菜新鮮翠綠又乾淨，有白菜、菜心、生菜、冬菇+粟米。清甜又健康。 鮮味海中蝦$128，海中蝦大隻又鮮味。 水庫大魚頭$78，大魚頭眼晶晶，好新鮮又滑溜。 漁火特色四色丸$128，有蝦丸、墨魚丸、牛肉丸、豬肉丸。全部都係手打，粒粒彈牙，尤其係墨魚丸又鮮又彈，而豬肉丸有粒鹹蛋黃，增添咗咸香。 三個人飽到要捧住個肚離開，今晚好滿足呀！