香港深水埗｜明發小食

招牌餃子唔單止皮薄餡靚，同場嘅懷舊豬油渣麵都同樣出色，豬油渣香脆可口，下次經深水埗可以再食！

分量多。經濟實惠好食。 鯪魚球真係實實在在用魚肉整，食得出有果皮茸和鯪魚肉的，口感出色好彈牙。 椰菜餃子，我跟店員說走湯，因爲我喜歡不要湯的餃子。 豆漿有好濃豆香味。

雖然粗眉仔對深水埗呢個地方好熟悉，但係都唔知基隆街有一間咁嘅小店。睇落佢係普通茶餐廳嘅格局，但係大部份食物都係餐廳自家人手製作，所以質素比一般茶餐廳好得多。 雖然茶餐廳出名嘅係醬爆豬肉，但係粗眉仔一向係牛腩控，自然就點佢哋嘅秘製牛腩飯。 牛腩飯大碗到無倫，而且非常之深，成碗野牛腩多飯少，$41真係超級抵食。五香牛腩超級入味，肥瘦適中，有咬口之餘又完全唔韌，而且完全冇溝蘿蔔，貨真價實。 生菜魚肉報稱人手打成，彈牙有鮮魚味，魚肉加入蔥花，感覺清新，加少少麻油就更加滋味，可惜冇胡椒粉。 餐廳嘅餃子好出名，幾乎每一個入嚟嘅顧客都會叫一份。 因為怕熱氣，所以粗眉仔唔敢叫煎餃，淨係叫咗碗湯餃。 一碗10隻，5隻韭菜餃加5隻菠菜餃，餃子唔係話肉餡越多就越巴閉嘅，雖然菜多肉少，但係餡料嘅配搭非常出色，除咗少量嘅肉同埋新鮮蔬菜之外，餡料入面仲加咗馬蹄同埋蝦米，層次豐富。 更加難得嘅係，用來做餡料嘅蔬菜非常之新鮮，食落啖啖爽脆鮮甜，絕對係非一般雪藏餃子可比，如果真係要雞蛋裏挑骨頭，只能夠講佢哋個湯底太普通囉。 老闆娘話佢哋嘅豆腐花都好出名，食過之後又發現真係冇講大話，香滑得嚟結實彈牙，非常難得，上枱嗰陣已經加咗薑汁同少量糖水，如果熱唔夠甜嘅話可以自己加黃糖。 提提大家，餐廳免費提供自己醃製嘅菜脯粒，不過辣到痴線，唔食得辣嘅可免則免。