香港大角咀｜Jau Fai Zi • 酒筷子

旺角高質中菜小館🥢 • 特色精緻小菜 — 🥩醬皇慢煮安格斯牛 $248 牛肉預先慢煮48小時 食落保持肉汁🤤 而且肉味比預期中濃郁☺️ 表面再輕輕煎香🔥 伴碟有炒萵筍同蘑菇粒 菇味香濃😋 另外附上Wasabi燒汁 味道幾攻鼻刺激😆 . 🐚豉椒花甲米粉底 $198 另一個高分之作👍🏻 花甲鮮甜冇沙 不過重點都係底下嘅煎米粉❗️ 煎米粉好考功夫 呢度做到外層焦香 中間係一條條爽口嘅米粉🤤 索晒豉椒汁好好味😋 . 🐷桂花陳酒蜜叉燒 $108 同出面酒樓食嘅叉燒有啲唔同 呢度似係西式啲嘅燒豬扒🤭 肉質做到好冧 有淡淡嘅桂花同蜜糖香味🌼

高質中菜 性價比好高！ 係近期食過比較滿意嘅一餐！ 基本上每款菜式都好味道 服務超級好 仲可以book房 免開瓶費 佢嘅玩法係幫你寫菜單 Book房嘅話，大概10人左右，$500-$600一位嘅菜單 其實佢哋都好flexible , 冇話一定要幾多錢點樣 又唔使要你落訂金 成個感覺好舒服 但係我唔肯定坐出邊人少嘅話係咪都係寫菜單，定係自己叫餸。 定位嘅時候，可以問吓。 我嘅菜單； 清酒鵝肝✨黃金豆腐，清酒醉鮑魚，順德煎魚餅✨桂花陳酒蜜叉燒✨八寶冬瓜盅，醬皇安燒方利✨雞油花雕蒸肉蟹（配生麵）✨菌皇脆炸雞✨上湯孫子浸莧菜，淮陽炒飯，十勝砵仔糕 全部嘢都好味，又大碟，蟹仲俾兩隻！ 我自己最鍾意就係上面打星星嗰幾款，特別係鵝肝，叉燒，煎魚餅，方利，同埋蟹！叉燒好正，方利第一次食，好香口！鵝肝超級creamy! 魚餅好好食，我食咗兩舊😆類似係顯解鯪魚球嘅魚餅版。 菌皇炸雞，下面真係有一咋菇菌，好正！ 雞油花雕撈埋啲麵好正，不過我個人喜好會鍾意配河粉，或者陳村粉嗰類多啲。反而佢哋好似係招牌菜嗰個安格斯牛，我就覺得一般。 所有朋友食完都話好想encore! 一席10位 $5380 抵！ Rating : 9/10

之前上網見到酒筷子嘅菜式好似幾特別同出色，就特登趁屋企人生日去咗大角咀試吓。餐廳唔算好大，裝修以簡約為主，都算坐得舒服。 佢哋嘅Menu比一般中餐廳選擇多，而且有幾多有創意嘅菜式，全部味道都好有驚喜，而且性價比都幾高。 醬皇慢煮安格斯牛 （$248）🥩 呢個慢煮牛超級好食，牛肉味道好濃郁，脂肪分佈平均，慢煮都啱啱好，好粉嫩，入口好嫩滑。特製嘅芥末燒汁中和左牛肉嘅油脂感，成個搭配好出色。 雞油花雕蟹（$600）🦀 花雕蟹嘅汁調配得好好，花雕味好突出，但又唔會蓋過左蟹嘅鮮味。蟹唔算大隻，但勝在夠新鮮，蟹肉都幾爽甜。蟹下面嘅嫩滑蛋白吸收晒好味嘅醬汁同埋蟹嘅鮮味，送飯一流，連平時唔係好鍾意食蟹嘅我都覺得好好食！另外，佢哋嘅花雕蟹可以另加生麵，生麵蛋味重，配上濃郁嘅醬汁，超級掛汁，實在好食都停唔到口。 鳳梨咕嚕肉（$108）🍖 咕嚕肉嘅炸粉粉漿調配恰到好處，食起嚟超級酥脆，但又唔會過厚。肉嘅話肥瘦啱啱好，食落爽口。醬汁甜酸度亦都適中，配上新鮮嘅甜椒同埋菠蘿，算係我近排食過最好嘅咕嚕肉！ 菌皇脆炸雞（半隻）（$148）🍗 脆炸雞外皮炸得好好，好酥脆，亦唔會過分油膩。雞肉嘅話，仲係好嫩滑，有肉汁，而且都幾入味。我最驚喜嘅係雞下面墊左好多鮮菌，佢哋吸收左雞嘅精華，配上甜甜地嘅醬油，好好食！😋